Fan mitan-aw sa Pacquiao-Cotto fight gidala sa tambalanan

CEBU, Philippines - Usa ka fan sa boxing icon nga si Manny Pacquiao ang giingong nawad-an og panimuot ug gidala sa tambalanan  tunga-tunga sa away ni Pacquiao ug Miguel Cotto kagahapon sa hapon diha sa Fisherman’s Net sa barangay Lahug ning dakbayan.

Si SFO1 Wendell Villanueva mihatag og impormasyon sa Banat News nga usa ka “Boy Sala” nga mitan-aw sa pay-per-view diha sa Fisherman’s Net sa barangay Lahug, dakbayan sa Sugbo ang nakuyapan. Si Villanueva nga nahiagi sa maong dapit nakuryoso ug misusi sa komosyon diha sa gawas sa maong kan-anan ug iyang nasayran nga gitabang sa mga sakop sa Emergency Rescue Unit Foundation ang maong tawo.

Matud pang Villanueva miabiba kang Pacman ug naglukso-lukso sa kalipay ang maong tawo dihang kalit kining natumba ug nawad-an og panimuot, ang mga kabanay na niining kauban niya pagtan-aw maoy midala kaniya sa gawas aron makaginhawa ug mitawag sa ERUF.

Sa report sa Balitang Bisdak, mikumpirmar ang tagdumala sa maong kan-anan nga dunay kustomer nilang gitabang ug gidala sa tambalanan, giingong maayo pa kaayo kining abiba sa gitan-aw dihang kalit kining nalup-og.

Si Emil Manija, usa sa mga paramedic sa ERUF mikumpirmar nga dunay girespondehan ang iyang mga kaubanan diha sa maong kan-anan ala-una pasado kagahapon tungod sa tawong nawad-an og panimuot.

Gikatahong gidala kini diha sa Perpetual Soccuor Hospital sa dalan Gorordo, dakbayan sa Sugbo.

Ang Banat News mitawag sa nahisgutang tambalan apan ang nurse nga nakatubag nagdumili sa paghatag og impormasyon o kumpirmasyon sa pangalan kabahin sa tawong gihatud diha sa ilang tambalanan nianang orasa. – BANAT NEWS