CEBU, Philippines - Usa ang patay ug duha ang naangol dihang aksidenteng nakuryentihan human nisablay sa linya sa kuryente ang antenna sa telebisyon nga ilang gitaud sa atop sa balay sa Upper Linao lungsod sa Minglanilla niadtong Biyernes sa alas 8:30 sa buntag.
Ang namatay paghiabot sa tambalanan mao si Rene Cañares Jr., 35, molupyo ra sa maong dapit samtang nalandig sa tambalanan ang kapuyo niining si Marites Fernandez ug manghud nga si Diosdado Fernandez Jr., 34, pulos molupyo sa maong dapit.
Matud pa ni SPO4 Renato Masangkay sa Minglanilla Police dihang nahinabi sa Banat News nga ang namatay nga si Rene ug Diosdado nagtinabangay pagtaud sa antenna sa telebisyon ibabaw sa atop sa ilang pinuy-anan niadtong tungura.
Sa tanto nilang liwagliwag niini aksidenti kining natumba ug adto nasandig sa mainline sa Visayan Electric Company (VECO) duol sa ilang balay hinungdan sa ilang pagkakuryente.
Si Marites pagkakita sa gidangatan sa iyang kapuyo ug igsuon daling miresponde ug misuway og bitad kanila apan hasta siya naapil sa pagkakuryente ug ang tulo pulos nangahagba.
Ang mga silingan na nilang nakabantay sa linagubo mao nay mitabang ug midala sa mga biktima sa Minglanilla District Hospital apan gideklarar nga dead on arrival si Rene.
Samtang si Marites ug Diosdado gibalhin usab dayun sa Vicente Sotto Memorial Medical Center (VSMMC) alang sa dugang medikasyon. (Darrel Carumba ug Guam Logroño) (BANATNEWS)