Pangalan sa killers nalitok sa biktima

CEBU, Philippines - Biktima sa pagpanunggab gikatahong nakatug-an pa sa pangalan sa usa sa tulo ka lalaking midunggab kaniya diha sa sitio Maypis barangay Captain Claudio siyudad sa Toledo niadtong Huwebes sa alas 7:00 sa gabii.

Ang biktima mao si Timoteo Delima Jr., alyas Kulafu, 22, molupyo sa nahisgutang lugar, samtang ang mga suspek mao sila si Jerry Embralinag ug ang managsuong Danny ug Roger Segovia, pulos nagpuyo gihapon sa maong lugar.

Subay sa imbestigasyon ni PO3 Praxilo Albeso sa Toledo City Police gikan sa amahan sa biktima nga si Timoteo Sr., 57, kini mibutyag nga naabot ang iyang anak sa ilaha nga nagtinga na ug nagkadugo.

Sumala pa sa amahan ngadto sa kapolisan nagtan-aw sila niadtong tungura og telebisyon dihang naabot ang biktima nga may mga samad dinunggaban sa walang bahin sa dughan ug walang bahin sa bukton.

Apan matud sa amahan sa biktima nga sa wala pa mabugtu-i sa gininhawa ang biktima nakasulti pa kini sa nahitabo kaniya nga samtang naglakaw siya sa dalan paingon na untang mopauli dihang kalit nga mibabag sa iyang agianan ang mga suspek ug gitabangan siya og dunggab.

Matud pa sa amahan human sila tug-ani sa mga pangalan sa mga suspek hinay-hinay'ng nalup-og ug nabugtoan sa gininhawa ang iyang anak.

Gibutyag ni PO3 Jerson Lebumfacil sa Toledo City Police dihang nahinabi sa Banat News nga karaang panagbingkil tali sa biktima ug mga suspek ang motibo sa krimen.

Ang amahan sa biktima mitug-an sa kapolisan nga gitabangan na og kulata niadtong milabay'ng tuig sa mga suspek.

Ang kapulisan padayun pa sa ilang manhunt operation pagsikop sa tulo ka mga suspek nga daling nakasibat human sa hitabo.   (BANATNEWS)