Tomas mangayo'g katin-awan sa NEDA bahin sa LRT, MRT
CEBU, Philippines - Mangayo og katin-awan ang kagamhanan sa dakbayan sa Sugbu labot sa pagpasiugda sa National Economic and Development Authority (NEDA) Secretariat og review ug undertaking sa Metro Cebu Mass Rail Transit Project.
Mipadala na og suwat si Mayor Tomas Osmeña ngadto kang NEDA-7 Regional Director Marlene Rodriguez tungod kay gustong masayod ang mayor kung unsay legal nga gibasehan ang NEDA pagpahigayon og review sa nahisgutang proposal.
Kini tungod kay nasuta ni Osmeña nga wala giduso sa Department of Transportation and Communication (DOTC) ang Mass Rail Transit (MRT) dihang iyang gikahinabi si DOTC secretary Leandro Mendoza niadtong miaging adlaw didto sa kauluhan.
Gani miingon si Osmeña nga wala pa dawata sa DOTC ang unsolicited Build-Operate Transfer (BOT) proposal sa AMA Group Holdings.
Gipasabot sa mayor nga gikinahanglan ang endorsement sa DOTC sa maong matang sa proyekto tungod sa kadako sa gahin nga gikinahanglan niini.
“An endorsement for project of this nature has to come from DOTC and that’s from the secretary not from somebody below,” sumala pa sa mayor.
Nisamot karon ang pagduda ni Osmeña nga dunay dakong anomaliya nga nag-ung-ong kung mahinayon ang nahisgutang proyekto nga mogamit og dakong pundo.
Una nang gipadayag ni Osmeña nga iyang tambungan ang tigom sa Regional Development Council (RDC-7) sunod buwan aron sutaon kung kinsay mopabor sa proyekto apan mibahad na siyang daan nga iyahang pasakaan og kaso ang maong mga opisyal tungod kay siya nabalakang parehas lang kini og dangatan sa anomaliya sa lampposts. (BANATNEWS)
- Latest
- Trending
