CEBU, Philippines - Dul-an sa P200 mil ang danyos sa naugdaw nga mga kahoy sa nahitabong sunog sa Kimberson Lumber sa Bulacao kagahapon sa buntag nga miresulta usab sa pagsuspenso sa klase sa kasikbit nga Bulacao Community School tungod sa kabaga sa aso sa maong dapit.
Si SFO3 Alicasim Espinola, imbestigador sa Cebu City Bureau of Fire Protection nagkanayon nga usa ka Mario Badayo ang mitug-an kaniya nga aduna kini nasigpatan nga mi-spark nga wire sa kuryente sa gawas nga bahin sa ilang buhatan. Misunod dayon niini ang pag-ulbo sa kalayo diha sa dryer sa mga kahoy nga gibutangan sa 40 thousand board feet nga Gemilina lumber nga gipauga sa sulod.
Gikatakda untang matapos ang pagpauga sa maong mga kahoy karong adlaw'ng Lunes.
Dugang pa ni Espinola nga nadawat nila ang maong alarma pasado alas 8 sa buntag ug giisa ngadto sa 2nd alarm apan nakontrolar ra usab kini sulod sa lima ka minutos.
Samtang si Fire Marshal Ismael Codilla nagkanayon nga aduna siya'y pagdudang adunay gibutang nga chemical sa dryer maong dali ang pagkatap sa kalayo. (BANATNEWS)