CEBU, Philippines - Nakatilaw og kasaba si Cebu City Fire Marshall Supt. Ismael Codilla gikan kang Konsehal Augustus Pe Jr. atol sa gipahigayong Police Coordinating and Advisory Council (PCAC) meeting kagahapong adlawa.
Wala hinuon ibutyag sa fire marshal ang hinungdan sa kasuko sa konsehal nga maoy ni-preside sa nahisgutang tigom apan kini posibleng may kalambigitan sa kapakyas pagtubag sa fire truck sa Lahug fire sub-station dihang naigo sa sunog ang nahisgutang barangay.
Subay niini, giplantsa na sa kabumberohan sa dakbayan ang ilang angayang buhaton kung dunay maguba nga mga trak sa bombero, ang fire department sa dakbayan duna lay walo ka mga fire trucks.
Gipahibalo hinuon ni Codilla nga sa sunod semana dunay laing duha ka fire trucks nga gipaayo ug ila nang makuha og balik samtang hingusgan nila ang pagsuroy sa kabalayan.
Sa pikas bahin, gipahibawo ni City DILG Director Patricio Gabuya nga subli niyang awhagon ang ilang uluhang buhatan paghatag og fire trucks sa siyudad tungod kay wala tubaga ang iyang suwat nga gipadala niadtong miaging buwan taliwa sa dakong fire fees nga gihatag sa dakbayan sa nasudnong kagamhanan.
Ang city government maghatagan og kapin sa P4 milyones nga fire fees matag tuig nga angayang ibalik sa fire department alang sa pagpalambo sa serbisyo niini.
Sa susamang kalamboan gipadayag ni Mayor Tomas Osmeña nga walay gipadangat nga hangyo sa kabumberohan sa dakbayan nga iyang gibalibaran.
Gipahibawo usab sa mayor nga ang city government mopalit og bag-ong trak sa bombero ngadto sa Estados Unidos ug kini ihatag sa barangay Santo Niño tungod usab sa maayong performance niini pagtubag og alarma sa sunog. (BANATNEWS)