Polis gikulata sa mga tawo

CEBU, Philippines - Polis sa Cordova nga gikulata sa mga tawong milaban sa drug pusher nga iyaha untang dakpon gikatakdang mopasaka og kaso .

Ang maong polis nga gikuninitan sa mga estambay sa sitio Soong sa barangay Mactan, dakbayan sa Lapulapu niadtong miaging gabii giilang si PO2 Andrew Salazar nga sakop sa Cordova Police Station.

Si SPO1 Henry Amores, imbestigador sa Cordova Police Station miingon nga kuyog ni PO2 Salazar ang iyang asawa ug bayaw sa pag-adto sa sitio Soong sa barangay Mactan aron pagpangita og computer technician.

Apan mihapit ang tulo sa usa ka burger stand aron mangaon dihang kalit giduolan sa usa ka lalaki ug gitanyagan og shabu ang maong polis hinungdan nga nagpaila siyang polis ug gidakop ang maong lalaki.

Tungod sa pagkisi-kisi sa maong drug pusher kalit mihamag ang mga estambay ug gikuninitan si Salazar ug nailogan kini sa iyang armas. Naatlan usab nga nangabot ang mga sakop sa Presinto 2 gipangulohan ni SPO1 Pablito Senadjan hinungdan nga mikaratel ang mga estambay dala ang caliber .9mm service pistol sa maong polis.

Giuli hinuon ang maong armas sa usa ka nagpailang ‘Dindo’ nga taga sitio Soong sa barangay Mactan ngadto sa ilang buhatan ug nangangkong igo ra kining gitunol kaniya sa usa sa mga tawong mikulata sa maong polis. (Romeo Limpangog)   (BANATNEWS)