Multicab natagak duha angol

CEBU, Philippines - Naangol ang usa ka yaya ug ang 5 anyos nga batang babaye nga gibantayan niini dihang nahagbong sa kanal ang multicab nga ilang gisakyan didto sa barangay Sta. Ana, lungsod sa Barili, niadtong Miyerkules sa buntag.

Ang mga biktima mao si Leonora Resuelo, 34 , minyo, ug ang gibantayan niini nga si MJ Mondejar, 5, tinun-an sa day care, nga taga barangay Cagay sakop sa maong lungsod.

Hinuon walay bun-og ang drayber sa multicab nga si Teodoro Buhay, 78,   nga taga Poblacion, Barili .

Si SPO4 Edward Villaester sa Barili Police Station mibutyag sa  Banat News nga ang multicab , gikan pa sa barangay Cagay ug paingon unta kini ngadto sa Sta. Ana, dihang paghiabot niini sa taytayan sa Sta. Ana kalit nga nawad-an og preno ug didto kini modasmag sa duha ka nag-parking nga traysikad una molahos ngadto sa kanal diin kini matagak.

Si Resuelo ug Mondejar kinsa nahiagom sa mga bun-og ug mga pangos sa lawas gihatod dayon ngadto sa Barili District Hospital samtang ang drayber nga si Buhay bulontaryong mitahan sa iyang kaugalingon ngadto sa kapolisan sa lungsod.   (Darrel A. Carumba)    (BANATNEWS)