Kawani napalgang patay sa balay

CEBU, Philippines - Usa ka kawani sa Cebu City Hall kinsa giingong puwerting kusoga moinom og bino ,napalgang patay sulod sa iyang gi-abangang lawak sa dalan Logarta, barangay San Roque, dakbayan sa Sugbo kagahapon pasado alas 6 sa buntag.

Ang maong empliyado nailhan nga si Eduardo Nuñez Armenion, 48, nga nadestino sa general service office sa City Hall.

Nasayran nga usa sa mga silingan sa biktima nakatimaho og baho sa patay sa dapit sa balay nga gipuy-an sa biktima hinungdan nga iya kining gisusi.

Nakurat nalang siya dihang maoy misugat sa iyang mga mata ang nagbuy-od sa higdaanan kansang lawas sa biktima nangluspad na ug wala nay kinabuhi busa nanawag dayon og polis.

Sa dihang gisusi, nasuta nga ang tibuok lawas sa biktima walay mga samad o bun-og nga agi sa usa ka foul play.

Apan aron sa pagsiguro gipaubos gyud kini sa autopsy aron maklaro nga ang iyang kamatayon dili tinuyo.

Matud pa ni SPO4 Jesus Moga sa Homicide Section sa pakighinabi sa Banat News nga kataposang nakit-an sa mga silingan ang biktima niadto pang Nobyembre 11, busa gituohan nila nga tulo na ka adlaw kining namatay.

Dugang pa ni Moga nga base sa mga estorya sa mga silingan nga puwerte kunong kusoga moinom og bino sa biktima hinungdan nga nagduda sila nagsugpa kini ug namatay.(Lesley Caminade)   (BANATNEWS)