Batan-on gipusil sa tawong nagtaptap

CEBU, Philippines - Patay ang usa ka batan-ong lalaki nga nabuslot ang dughan sa pagpamusil sa nagtaptap nga mamumuno alas 9 pasado ang takna sa miaging gabii sa Cobe Housing, barangay Canduman, dakbayan sa Mandaue.

 Ang namatay mao si Vincent Sebuco, 19, nagpuyo sa maong dapit kinsa gipusil sa wala pa mailhing lalaking gihulagway nga niwangon ang panglawas, 5’ 5” ang gitas-on, nagkawo ug nagtabon og tuwalya sa nawong niini.

Si PO2 Cedric Castillo, sa Presinto 6 sa Canduman Police Station nga nahinabi sa Banat News miingon nga naglakaw lang ang biktima pauli sa ilang panimalay dihang ang wala mailhing lalaki kinsa misugat sa pagduol ug kalit lang namusil.

Dugang pa ni PO2 Castillo nga nakabaton og samad pinusilan sa walang dughan ang biktima ug giingong nalapsan sa bala ang kasingkasing ug gideklarar nga dead on arrival sa mga doktor sa Mandaue City District Hospital.

Si PO2 Castillo miingon nga usa ka slug sa kalibre 45 ang napalgan diha sa crime scene.

Matud pa ni PO2 Castillo nga dili pa nila matataw kun naglambigit ba usab sa pagpanulis o fraternity ang maong pagpamusil sa biktima sanglit nagpadayon pa ang ilang imbestigasyon niini. (Romeo Limpangog)   (BANATNEWS)