4-anyos sa Alcoy ulahing nakalas sa dengue

CEBU, Philippines - Usa ka 4-anyos nga batang babaye ang labing ulahing namatay sa dengue sa lungsod sa Alcoy, Cebu ug lain pang 20 ka pasyente ang nalandig sa lainlaing tambalanan dinhi sa dakbayan sa Sugbo human gihapon matakboyi sa maong makamatay nga sakit.

Ang labing ulahing biktima sa dengue mao si Renalyn Lebosada, 4, day care pupil ug molupyo sa sitio Datag, barangay Daanlungsod, Alcoy, Cebu.

Matud ni Dr. Max Cang, municipal health officer sa Alcoy sa dihang nahinabi sa Banat News nga ang biktima na-admit sa rural health center sa Alcoy sa milabay’ng semana tungod sa taas nga hilanat ug sa milabay’ng semana nadiskobrehan nga miubos og maayo ang platelets niini hinungdan nga girekomendar nila nga ibalhin sa Vicente Sotto Memorial Medical Center (VSMMC) apan pagka-Sabado sa alas 11 sa buntag, namatay gyud kini. “Nagkinahanglan gyud to siya og dugo kay ni 79 naman ang platelets niya nianang pagka-gabii mao tong amu dayong gipadala unya ni-lower pagseguro pag-abot didto,” dugang asoy ni Cang.

Gidugang ni Cang nga gawas niini duna pay laing 20 ka pasyente ang gi-refer nila og nalandig karon sa lainlaing tambalanan dinhi sa dakbayan sa Sugbo tungod gihapon sa dengue diin 15 niini nahimutang sa VSMMC, tulo sa Chong Hua Hospital, usa sa Perpetual Succor Hospital ug laing usa sa Visayas Community Hospital.

Matud ni Cang wala pa kini labot sa na-admit sa ilang sentro ug niadtong nahilantan diha lang sa ilang panimalay ug naayo nga wala na magpa-admit.

Si Konsehal Loven Dingding sa Daanglungsod mibutyag sa Banat News nga ang pamilya sa biktima mibasol sa usa ka poultry farm nga gipanag-iya sa usa ka konsehal sa lungsod ug plantasyon sa Carnara tree nga gipanag-iya sa bise mayor nga nahimutang sa maong lugar nga maoy tinubdan sa lamok nga nagdala sa dengue.

Hinuon sukad niadtong Martes gibutyag ni Dingding nga gipahigayon dayon sa mga health inspector ang fogging operation sa maong lugar nga maoy gihugpaan og maayo sa dengue.

Nunot niini, gipadayag ni Provincial Health Officer Cristina Gianggo sa dihang nahinabi sa Banat News nga nadawat na nila ang report nga pagsaka sa kaso sa dengue sa maong lungsod nga nakapatay na og 4-anyos nga bata. – BANAT NEWS