Stalls duol simbahan sa Talisay panglaruton

CEBU, Philippines - Gimando ni Talisay City Mayor Socrates Fernandez niadtong Miyerkules ang paglarot sa mga stalls sa mga manindahay nga gitugotang makatinda atol sa piyesta sa siyudad nga hangtud karon wala gihapon manghipos diha duol sa simbahan sa barangay Poblacion.

Ang grupo sa Special Operations Team (SPOT) ang gimanduan sa mayor sa paglarot sa mga nahisgutang estraktura diha sa barangay Poblacion tungod kay ang tagal nga sila patindahon napupos na.

Si Jane Enrile, hepe sa licensing department sa pakighinabi niini sa Banat News nagkanayon nga napulo ka mga stalls pa ang wala pa manghipos sa nahisgutang lugar.

Ang maong mga vendors gitugotan sa pagpamaligya gikan sa Septiyembre 16, 2009 hangtud Oktubre 16, 2009 tungod sa pista niadtong Oktubre 15, 2009.

Matud ni Enrile nga sobra sa 100 ka mga vendors ang milukat og permit aron makapaninda ug tanan gipahimangnoang inig human sa piyesta ipatangtang na ang ilang mga stall apan uban kanila ang mihangyo nga mo-extend hangtud niadtong Nobiyembre 1, 2009. - Brenda Batuto (BANAT NEWS)