CEBU, Philippines - Posibleng iuli ra sa kagamhanan sa lalawigan sa Sugbu ang tunga sa milyong dolyar nga pasiunang bayad sa Korean Electric Power Corp. diha sa Kapitolyo human mahatagi og katungod sa Hunta ang gobernador nga suspensuhon o hunungon ang kasabutan sa lalawigan ug sa maong electric company.
Ang maong pasiunang bayad sa Kepco may kalambigitan kini sa pagtambak sa coal ash ngadto sa kontrobersyal nga loteng napalit gikan sa pamilyang Balili sa barangay Tinaan lungsod sa Naga.
Sumala pa ni Provincial Treasurer, Atty. Roy Salubre nga si Gov. Gwendolyn Garcia mahimong mouli na lamang sa maong kantidad ngadto sa Kepco.
Ang lalawigan ug Kepco dunay Memorandum of Agreement nga ilabay sa maong kompanya ang coal ash sa planta sa kuryente sa Kepco kun magsugod na kini og operate sa 2011.
Giklaro hinuon ni Salubre nga kining tanan mag-agad lamang sa desisyon ni Garcia inig abot niini gikan sa nasud sa China karong adlaw’ng Lunes.
Gipasabot hinuon ni Salubre nga ang maong lakang wala magpasabot nga undangon na ang giplanong kalamboan sa maong luna nga mao ang pagtukod og international port sa Naga ug ubang mga proyektong pang industriya.
Matud pa niini nga mahimong magpadayon ang pagpahigayon og reclamation sa maong lote pinaagi sa pagtambak og laing filling materials nga dili na coal ash gikan sa planta.
Si Salubre miingon usab nga mahimo ra nga aplayan sa kagamhanan ang bahin sa Balili property nga gideklarar nga timber land sa DENR.
Gani gitinguha sa gobernadora nga kasugdanang maong proyekto sa dili matapos ang iyang katapusang termino sa gobernador. - Chester Abadilla (BANAT NEWS)