Pangural sa UP gisupak sa mga residente sa Lahug

CEBU, Philippines - Nagubot kagahapon ang mga residenteng nasunogan sa barangay Lahug human gitaud sa mga representante sa University of the Philippines-Cebu Campus ang karatulang dili na pasudlan ang lugar nga gitarukan sa ilang mga panimalay.

Ang UP mipadala kang Alsidry Shariff, supervising administrative officer uban sa mga gwardiya nanaod sa mga karatulang nag-ingon “No trespassing, this is UP Property” apan tungod sa kapungot sa mga biktima sa sunog dali nila kining gisaka ug gipanglangkat ug gitaktakan.

Si Lahug barangay Kapitan Mary Ann delos Santos nagkanayon nga wala sa panahon ang gihimo sa UP ngadto sa iyang mga konstituwente ug mihulagway nga kini dili tawhanon.

Midugang ang kapitan nga wala say permisong iyang gitugutan ang UP pagkural sa maong luna. Ang maong luna may gilapdong 450 metro kwadrado nga nagbalor karon og P125, 000 per square meter sa market value.

Matud pa niya nga kun ipamugos sa UP ang maong lakang mamahimong duguon ang sangputan niini. Mipasalig ang kapitan nga makabalik sa pagpuyo ang mga biktima diha sa maong luna.

Ang UP dunay planong tukoran kini og edipisyo alang sa unibersidad apan mipasabot nga nasubo sila sa gidangatan sa mga residente apan nabalakang sila’y manubag sa gobiyerno niini kun di sila molihok pagbawi niini. - Brenda Batuto, Elly Bolonos ug Niña Sumacot sa The Freeman (BANAT NEWS)