3 'tulisan' sa bise mayor nadakpan

CEBU, Philippines - Tulo ka mga gidudahang tulisan nga gituohang nalambigit sa pagtulis sa kanhi bise mayor ug pagpatay sa iyang asawa niadtong nilabay’ng semana nadakpan sa kapulisan kagahapon sa kaadlawon sa barangay Tubod, Mantalongon sa nahisgutang lugar.

Ang nadakpan pinasikad sa search warrant mao sila si Mario Delfino, Roel Regual ug Alvin Regual nga pulos nakuhaan og mga .357 rebolber ug 38. rebolber uban sa mga bala.

Si Supt. Rodulfo Albotra, ang hepe sa Provincial Intelligence Branch (PIB) nagkanayon nga ang joint operation gihimo alas 6:30 sa buntag sa panimalay sa mga suspetsado. Wala hinuon makapalag ang tulo tungod kay nakalitan sa pag-abot sa mga polis, pakyas ang tulo pagpakita og papeles sa ilang mga armas.

Si Albotra miingon nga kumpirmado nilang nalambigit ang tulo sa mga pagpanulis sa habagatang bahin sa Sugbu ug ilaha na usab karong gisusi kun may kalambigitan ba sila sa pagtulis kang kanhi bise mayor Luisito Ponseca ug pagpatay sa asawa niining si Gina nga nakuhaa’g tunga sa milyon ka pesos nga cash.

Ang pangulo sa kapulisan sa lalawigan sa Sugbu Sr. Supt. Jesus Gaquing, nagkanayon nga dunay mga report nga ang grupo nilang Delfino nalambigit sa pagtulis sa kanhi bise mayor.

Gibutyag ni Gaquing nga base sa ilang nakuhang impormasyon nga dunay mga saksi sa dapit nga nakakita sa mga akusado sa crime scene pagtulis sa magtiayon.

Ang mga armas nga nasakmit ipa-ubos sa ballistic examination diha sa PNP-Crime laboratory 7. - Guam Logroño (BANAT NEWS)