Codilla gisahon sa PCAC

CEBU, Philippines - Gipaabot nga gisahon og pangutana si Cebu City Fire Marshal Supt. Ismael Codilla atol sa Police Coordinating and Advisory Council (PCAC) ugmang adlawa tungod sa kapakyas niini pagpahibalo nga nangaguba na ang pipila ka mga firetruck sa siyudad.

Wala makatubag ang firetruck sa Lahug Fire Sub-Station atol sa sunog sa maong barangay niadtong miaging gabii tungod kay kini gipaubos sa repair.

Apan matud ni Konsehal Augustus Pe Jr. nga dunay kamanduan ang dakbayan ngadto kang Codilla kun dunay maguba nga trak sa bombero.

“Our standing instruction to our fire marshal is hot, if there is a fire truck that’s not functioning in a particular fire sub-station, ang usa sa mga water tanker sa siyudad should be assigned there to cover up sa wa magdagan nga fire truck, he was already instructed long before nga mao na iyang himuon,” sumala ni Pe.

Nagkanayon ang konsehal nga kini na maoy ikaduhang higayon sa miaging pipila ka semana nga wala dayon makatubag ang trak sa bombero sa usa ka sunog.

Nahinumduman ni Pe nga nasunog usab ang pipila ka lawak-saringan sa Florencio Urot Memorial National High School nga anaa luyo sa Mabolo Fire Sub-Station.

Dismayado usab ang konsehal human masayod nga gawas sa firetruck sa Lahug, adunay laing pipila ka mga firetruck sa siyudad ang nangaguba. – BANAT NEWS