CEBU, Philippines - Gitahasan karon ang Cebu City Comelec North District nga maoy modawat sa tanang Certificate of Candidacy (COC) nga iduso sa mga kandidato sa umaabot nga eleksyon.
Kini maoy gibutyag ni City Election Officer Marchel Sarno human usab makadawat og direktiba gikan sa ilang rehiyonal nga buhatan.
Ang pag-designate sa maong buhatan nga maoy modawat sa mga COC gipasikad usab sa Comelec Resolution No. 8678 nga naaprobahan niadtong miaging buwan.
Subay niini, nanawagan si Sarno sa tanang mokandidato sa dakbayan nga molahos lang diha sa ilang buhatan kun kini moduso sa ilang COC.
Ang Comelec gitakda nang musugod pagdawat sa mga COC karong umaabot nga Nobyembre 20 hangtod sa tungang gabii sa Disyembre 1.
Sa iyang bahin, gipasabot ni Comelec regional director Rene Boac nga ang bag-ong lagda sa Comelec nag-designate kaniya pagtudlo og modawat sa COC kun dunay duha ka election officer ang usa ka lugar.
Sa pikas bahin, gipahibalo ni Sarno nga nagsugod na og susi ang mga surveyor sa Smartmatic/Total Information Management consortium sa mga polling place sa siyudad.
Kini aron pagtan-aw nga dunay telecommunication signal ang mga polling place pagseguro nga malikayan ang transmittal problem pagpatuman sa poll automation.
Ang Smartmatic gideklarar sa Comelec nga winning bidder alang sa P11.3 bilyones nga poll automation project sa sunod tuig.
Gibanabana ni Sarno nga molanat og usa ka buwan ang ipahigayong survey sa Smartmatic ngadto sa gatusan ka polling precincts sa siyudad.
Ang dakbayan sa Sugbo dunay kapin sa 2,000 ka presinto sa miaging piniliay apan ang uban niini gihiusa tungod sa ipatuman nga poll automation sunod tuig. – BANAT NEWS