Notorious robber nasikop

CEBU, Philippines - Usa ka lalaki ang nasikop sa grupo sa Theft and Robbery Section human kini hisayri nga usa ka “notorious robber” ug gitumbok nga iladong kawatan sa taga sitio Laray, barangay Carreta, dakbayan sa Sugbo sa miaging hapon.

Si Maximo “Jun Waray” Maglasang Mesias, 30, nga taga MJ Cuenco Avenue nasikop sa mga otoridad dihang nasigpatan kini ug nakuhaan ug folding knife nga adunay gitas-on nga singko polgadas.

Ang suspetsado sa sayo pa giingong may makapaduda kaayong lihok maoy hinungdan nga gisita kini sa mga sakop sa TRS kay giingong buot na unta kining   manulis sa maong dapit.

Matud pa ni SPO1 Mario Pasuelo sa TRS nga sa ilang gipahigayon nga background check sa suspetsado, ilang nasayran nga adunay pipila ka kaso nga giatubang sa korte ang maong tawo. - Lesly Caminade (BANAT NEWS)