CEBU, Philippines - Nasakmit sa kapolisan ang video karera machine ug 20 ka linikit sa pinaugang dahon sa marijuana gikan sa usa ka tawo nga nadakpan dihang gironda sa mga otoridad sa kapolisan ang balay niini didto sa sitio Villa Mangga , barangay Opao, dakbayan sa Mandaue sa miaging hapon.
Ang suspetsado mao si Welhem Mendoza, 35 , bulag sa iyang asawa , nga taga Villa Mangga, kinsa nadakpan sa team sa kapolisan sa Opao Police Station nga gipangulohan ni Senior Inspector Alfredo Ortiz.
Si PO3 Gregorio Cabesares sa Presinto 5 sa Opao Police Station nga nahinabi sa Banat News miingon dugay na nilang gipanid-an ang illegal nga kalihokan sa suspetsado.
Dugang pa niya nga ang illegal nga kalihokan sa suspetsado mao ang pagbuntagay sa video karera machine ug pagpayuhot usab og illegal nga drugas sa maong dapit.
Midugang siya nga gisakmit nila ang video karera gikan sa balay sa suspetsado ug sa ilang pagrikisa sa lawas niini maoy ilang nadiskubrehan nga nagluklok kini og 20 ka sticks nga marijuana.
Si PO3 Cabesares miingon nga duha ka mga kaso karon ang ilang giandam nga ipasaka ngadto sa piskalya batok sa maong dinakpan nga naglakip sa kalapasan sa Republic Act 9165 kon Comprehensive Dangerous Drug Act ug kalapasan sa Republic Act 1602 kon illegal nga sugal. - Romeo T. Limpangog (BANAT NEWS)