Nerez midepensa ni Dagasdas

CEBU, Philippines - Walay nakitang kasaypanan si Chief Supt. Lani-O Nerez, pangulo sa Police Regional Office (PRO-7) kang Sr. Insp. Milo Dagasdas, hepe sa Compostela Police Station nga napakyas sa pagduso’g report dihang napatay sa mga sakop sa National Bureau of Investigation (NBI) ang grupo sa mga tulisan nga sila si Alvin Flores ug mga kauban didto sa barangay Estaca niadtong miaging semana.

Kini maoy giklaro ni Nerez, atol sa iyang pag-atubang sa mga sakop sa tigbalita bisan kun aduna nay imbestigasyong gipahigayon ang PRO-7 batok kang Sr. Insp. Dagasdas.

Si Nerez nagkanayon nga siya mismo ug si Sr. Insp. Dagasdas nagka-estoryahanay human siya pahibaw-a kalabot sa maong insidente pinaagi sa cell phone diin didto kini sa area hangtod nga nahurot ang battery niini.

Matud pa ni Nerez nga mipahibalo usab si Sr. Insp. Dagasdas sa maong insidente ngadto sa iyang immediate superior nga si Sr. Supt. Jesus Gaquing hinungdan nga wala siyay nakitang lapso sa iyang trabaho.

Gani gipahibalo siya niini nga ang NBI, base sa ilang blotter miadto gyud sa Compostela Police Station sa mga alas 4:52 sa hapon niadtong adlawa una mapatay si Flores ug laing tulo niya ka mga kauban.

Milanat og hangtod sa alas 12:00 sa tungang gabii ang ilang panag-estorya ni Sr. Insp. Dagasdas human kini mobalik ngadto sa Police Station sa maong hitabo.

Gipadayag ni Nerez nga si Dagasdas wala magkulang sa iyang trabaho apan gumikan sa sitwasyon nga kontrolado sa NBI wala dayon kini makatunol og tukmang detalye sa mao ng hitabo.

Nasayran nga nasuko si PNP Chief Jesus Versoza, nga wala gilayon makahibalo sa maong insidente ug si Presidente Gloria Macapagal Arroyo pay mipahibalo niini hinungdan nga gipa-imbestigar ang mga pulis sa maong bahin sa maong problema.  – BANAT NEWS