Usa sa killers sa 'kawatan' nailhan

CEBU, Philippines - Nailhan na ang usa sa tulo ka lalaking miguyod gawas sa balay ug mipatay sa usa ka mag-uumang gipasanginlang kawatan sa sitio Binaliw 3 barangay Binaliw ning dakbayan niadtong Domingo sa kaadlawon.

Ang imbestigador sa Homicide Section nga si SPO4 Jesus Moga mibutyag sa Banat News nga duna na silay lead ug nailhan na ang usa sa tulo ka mga killers ni Maximo “Pla-Pla” Managat Padayogdog.

Midumili hinuon sa paghingalan ang kapolisan kaniya samtang gipalig-on pa ang kaso pinaagi sa pagkuha og mga testimonya ug ebidensya.

Nagtuo ang kapolisan nga dunay dakong atraso ang biktima ngadto sa maong tawo maong nabuhat nila kini kaniya.

Usa sa mga killers gikatahong nadunggan pang mimando sa mga kaubanan sa pag-ingon “Tiwasi na, tiwasi!” Si Padayogdog nakaangkon og daghang samad pinusilan sa kalawasan ug wala na makaabot nga buhi sa tambalanan.

Nakakuha usab ang kapolisan og 13 ka mga basiyo ug slugs sa kalibre .45 nga bala diha sa crime scene.  - Lesley Caminade (BANAT NEWS)