Lending nakuhaan P100 mil

CEBU, Philippines - Mokabat sa P100 mil ang nadala sa wala mailhing kawatan human gilungkab ang usa ka lending firm sa Malinao Street, barangay Poblacion lungsod sa Daanbantayan kagahapon.

Usa ka Junrel Bataican mao nay mipahibalo sa kapolisan nga gilungkab na ang ilang buhatan nga gipanag-iya sa iyang amahan nga si Wilfredo Bataican.

Si PO1 Rosalie Arnuco sa Daanbantayan Police Station nga gikahinabi sa Banat News nagkanayon nga ang Gabay sa Kaunlaran Lending Cooperative maoy gisulod sa wala matinong kawatan.

Matud pa ni Arnuco alas 7:30 kagahapon sa buntag padulong na untang mangabli si Junrel dihang iyang nabantayan ang roll-on-roll off nga pultahan nga abli na ug wala na ang duha ka padlocks.

Gikatahong gigamitan sa mga kawatan og bara de kabra ang pultahan ug giguba ang padlock ug dihang didto na sa sulod giguba usab ang aluminum frame nga pultahan ug ang vault nga gisudlan sa maong salapi.

Ang kapulisan nagpadayon pa sa ilang imbestigasyon ug wala pay matumbok kun si kinsa ang mga responsabling manglungkabay sa nahisgutang lungsud. (Guam Logroño)   (BANATNEWS)