Gitulis, gilugos, gipatay

CEBU, Philippines - Usa ka 57-anyos nga dalagang caretaker sa panimalay ang napalgang patay ug nagsugod na og kadugta ug gituuhang gitulis dayon gilugos una pa gipatay sa wala pa mailhing mamumuno.

Ang biktima mao si Lorna Castillo Recamora, 57, dalaga, molupyo sa nahisgutang lugar ug caretaker sa pinuy-anan sa balay sa iyang paryente nga atua manarbaho sa gawas sa nasud.

Matud pa ni SPO1 Jerome Pardo sa Ronda Police dihang nahinabi sa Banat News nga ang silingan sa biktima nga si Alma Tomaquin, maoy nakamatikod sa kabaho gikan sa gipuy-an sa biktima. Tungod niini iyahang gisubay diin ang baho maggikan ug mao nalay iyang nakit-an ang patay'ng lawas sa biktima nga nagbuy-od na ug naglunang sa kaugalingong dugo ug maoy nanimaho.

Ang kapolisan paghiling sa patay'ng lawas niini nga dunay daghang dinunggaban sa nagkadaiyang parte sa kalawasan nga maoy nakaingon sa hinanali niining kamatayon.

Ang barangay kapitan nga si Rolando Ugie mao nay daling gipahibawo ni Tomaquin ug mao na say mitawag sa kapulisan.

Base sa kondisyon sa patay'ng lawas sa biktima sa kapolisan gituohang duha ngadto sa tulo ka adlaw'ng patay si Recamora.

Dugang pa sa kapolisan nga wala nay shorts ug panty ang biktima gawas lang sa pang-ibabaw'ng sinina maoy gisuot niini hinungdan sa pagtumaw sa ilang pagdudang posibleng gilugos kini una pa gipatay.

Napalgan diha sa crime scene ibabaw sa nagkatag sa lamisa sa lawak niini ang mahalong kwentas ug singsing, kwartang wala pa matino ang kantidad. Apan gituohang dunay uban pang mga butang sa biktima nga nangahanaw ug posibleng gidala sa mamumuno.

Matud pa ni SPO1 Pardo sa unang pag-report diha sa ilang buhatan gidudahang naghikog ang biktima apan dihang ilang gisusi ang crime scene ug ang patay'ng lawas niini mas dako ang posibilidad nga gitulis kini ug gilugos ug misuway og sukol hinungdan nga gipatay.

Batang may thoracic ectopia cordis wala maoperahi; duna nay mitabang

Gumikan sa mga nakitang komplikasyon sa kahimtang sa panglawas sa batang gipanganak nga ang kasing-kasing naa sa gawas sa dughan wala mahinayon ang gikatakdang operasyon niini kagahapon.

Sumala pa sa apuhan sa bata nga si Delia Etcuban nga gikahinabi sa Banat News sa telepono gipasabot ug gieksplikahan siya sa mga espesyalista kabahin sa kahimtang sa kasing-kasing ug sa sulod sa lawas karon sa iyang apo nga giingong may sakit nga thoracic ectopia cordis.

Base sa eksplinasyon kaniya, giingong giangkon sa mga doktor nga lisod ang pag-opera niini tungod kay ang tinai sa bata nadasok pataas, nigamay ang baga niini ug may gusok nga daw napiit sa ilawom nga nakapalisod sa pagginhawa niini.

Ang bata nagkinahanglan pang ipailawom sa ultrasound aron masusi ang sulod sa kasing-kasing niini kun duna pa bay laing problemang wala pa nila makita.

Gumikan sa kadako sa kantidad nga gikinahanglan ug sa kawalay sigurohan sa operasyon nagplano silang mogawas nalang sa maong tambalanan kagahapon.

Apan matud pa ni Etcuban, dihang gisuwayan og tangtang og oxygen ang bata gikatahong milagom kini sud lang sa pipila ka minutos, timaan nga di kasugakod sa iyang kaugalingon ang baga.

Ang inahan sa bata nga si Sweetsie Etcuban Magdadaro gikatakdang moabot karong adlawa gikan sa Daanbantayan, ang banay'ng Magdadaro nagproblema karon sa kwartang magamit alang sa bata.

Samtang dako ang pasalamat ni Etcuban sa usa ka lalaking mibisita kanila kagahapon nga nagpailang “taga atbang” nga mitunol og P3 mil nga salapi.

“Blessing in disguise gyud kaayo kay pag-abot niya duna gyu'y mga resetang kinahanglan paliton, ang iyang gitunol nga kwarta gyud ang among nagamit,” matud pa ni Etcuban dugang sa pag-ingon nga nakakita ang maong tawo sa hulagway sa bata dinhi niining maong pamantalaan maong naaghat kini pagtabang.

Samtang si Daanbantayan Mayor Sun Shimura mipadala na og sakop sa social welfare office sa ilang lungsod kagahapon pagsusi sa panginahanglan sa bata. (Edwin Ian Melecio)    (BANATNEWS)