CEBU, Philippines - Nadakpan og balik sa kapulisan ang usa ka pinirisong nakapuga niadto pang milabay’ng buwan sa Mayo ning tuiga sa detention cell sa Borbon Police Station sa lungsod sa Borbon niadtong Domingo sa ala 1:00 sa hapon.
Ang puganteng si Edison Cabahug, 37, apan dunay kapuyo lumad nga taga Poblacion, Borbon nabilanggo tungod sa kasong pagpamaligya og gidiling drugas ingon man paghupot og armas nga walay lisensiya.
Matud ni SPO2 Maximo Sanico sa Borbon Police dihang nahinabi sa Banat News usa ka asset ang mihatag og impormasyon pinaagi sa text message kabahin sa presensya sa maong pugante nga nagsakay og bus sa lungsod sa Carmen paingon sa dakbayan sa Sugbo.
Dali dayung nakig-alayon ang kapulisan sa Borbon sa Danao Police Station hinungdan nga gipahigayon ang checkpoint sa Dangpanan Center (outpost) sa barangay Sabang sa dakbayan Danao ala 1:00 sa hapon niadtong Domingo nga miresulta pagkasikop niini.
Si Cabahug mieskapo alas 8:00 sa buntag niadtong petsa 12 sa bulan sa Mayo pinaagi sa pagguba sa rehas sa selda sa detention cell niini nga wala mabantayi. (Darrel Carumba) (BANATNEWS)