CEBU, Philippines - Gikombikto sa korte ang usa ka polis sa kasong acts of lasciviousness human mamatud-ing sad-an sa pagpanghinol sa pribadong bahin sa lawas sa usa ka minor de edad
Ang gikombikto ni RTC-7 Branch 14 Judge Rafael Yrastorza Jr. sa kasong acts of lasciviousness mao si PO1 Renido Sarzuelo Villaraiz.
Si Judge Yrastorza misilot kang PO1 Villaraiz nga mabilanggo gikan sa unom ka bulan ngadto sa usa ka tuig ug pagbayad og 25 mil ka pesos ngadto sa biktima isip danyos. Si Judge Yrastorza mihatag og gibug-aton sa alegasyon sa usa ka 17- anyos nga dalagita kinsa niasoy nga nahitabo ang pagpanghinol niadtong Disyembre 15, 2008 sa gabii sa ilang panimalay sa sitio Bonbon, Ocaña, Carcar.
Ang akusadong polis kalit lang migakos, mihawok ug mihikap sa iyang pribadong parte sa lawas apan nakapangayo siya og tabang hinungdan nga midagan ang suspetsado.
Matud pa sa huwes nga dili niya madawat ang pangangkon sa polis nga siya maoy gipasulod sa biktima ug mipasaka kaniya atol sa pagkuha niya sa sukli sa ilang gibayad sa inom, ug dihang diha na siya sa taas ang biktima maoy nagpasabak kaniya ug maoy naabtan sa mga kabanay.
Ang huwes mihatag pa og kahigayunan sa polis nga maka-apelar sa maong hukom.(Chester Abadilla) (BANATNEWS)