Tungod sa suarry operation sa Consolacion: Mayor, Kapitan nagkatinubagay

CEBU, Philippines - Barangay kapitan ingon man mga residente sa barangay Panoypoy lungsud Consolacion mialsa na batok kang Mayor Avelino Gungob tungod sa quarry operations diha sa ilang lugar.

Si Kapitan Dennis Balaba sa barangay Panoypoy, nagpa-blotter niadtong Nobiyembre 5 sa alas 8:00 sa buntag ug mipasangil nga gitulisok ug gisuwayan siya sa pagsumbag sa mayor niadtong petsa 4 ning bulana mga alas 4:30 sa hapon.

Ang kapitan ug ang mayor nagkatinubagay human babagi sa kapitan ang nagpadayong quarry operation diha sa iyang barangay bisan paman sa pahibalo sa Department of Environment and Natural Resources (DENR) nga ipahunong na ang pagpangubkob sa maong lugar.

Ang mayor nga mianha sa dapit pagtan-aw sa quarry operation gikatahong mitambag kang Balaba nga kun dunay mga advise ang DENR angayan ang mga personnel niini maoy moadto sa iyang buhatan.

Matud pa sa kapitan ngadto sa kapolisan, diha-diha gitulisok siya sa mayor ug giingnan og “Unsa man ka sumbagay ka, mga supakero gyud mo sa akong mga proyekto sa lungsud,” dayong hana og sukmag apan usa sa mga bodyguard sa mayor nga si Antonio Guttierez, hepe sa Consolacion Traffic Command (CONTRACOM) mipatunga kanila.

Ang mayor sa iyang bahin midangop usab sa kapolisan ug mitug-an nga giduol siya sa kapitan ug gibadlong tungod sa pahibalo sa DENR apan dihang iyaha kining giingnan nga adto nalang sa iyang buhatan tukion uban sa DENR ang isyu gikatahong wala kini (kapitan) ‘respetar’ ug ‘batasan’ ug nagpadayon sa pagyawit kaniya.

 Ang kapitan mipasabot nga igo ra niyang gibadlong ang quarry operations sa iyang dapit ug giingnan ang mayor nga mahimo niining hutdon og hakot ang kabukiran sa ilang barangay kun kini makapakita og permiso ug pagtugot gikan sa DENR. Ang mayor gikatahong mibahad pagkiha sa kapitan.

Ang deputy provincial for operation Supt. Romeo Perigo, nagkanayon ilang susihon kun duna bay pagtugot ang maong quarry operations ngadto na sa Mines and Geo-Sciences Bureau (MGB) ingon man sa DENR.

Hinuon iyang gikahinabi ang hepe sa Consolacion nga si Chief Insp. Bonifacio Tecson ug kini mibutyag nga gipahunong na karon ang quarry operations diha sa barangay Panoypoy.   (BANATNEWS)