CEBU, Philippines - Usa ka wala hiilhing lalaki ang namatay human kini dunggaba sa wala hiilhing kriminal duol sa gasoline station sa barangay Basak, dakbayan sa Mandaue kagahapon sa kaadlawon.
Ang biktima gibanabanang anaa sa 19 ngadto sa 20 anyos ang panuigon, kasarangan ang gidak-on sa lawas ug nagtaud kini og ariyos sa iyang dunggan.
Si PO2 Cristito Raboy sa homicide section sa Mandaue City Police Office (MCPO) miingon nga pipila sa mga nakasaksi sa maong insidente mitug-an kanila nga ang namatay naglakaw lang sa maong dapit.
Unya nasugatan niini ang grupo sa mga batan-on ug usa niini ang miduol ug gihansakan sa kutsilyo ang lawas sa biktima sa makadaghang higayon.
Human sa maong pagpanunggab ang maong grupo sa mga batan-on ang nag-iyahay og panagan pahilayo sa maong lugar ug ang biktima nga nagping-it sa kasakit sa samad dinunggaban nga naangkon, nakasinggit pa sa pagpangayog panabang.
Dugang pa ni PO2 Raboy nga gidala ang biktima sa Mandaue City District Hospital apan gideklarar kini sa mga doktor nga dead on arrival.
Si PO2 Raboy miingon nga ang haya sa patay’ng lawas sa wala pa hiilhing biktima ang kasamtangan karong gipahiluna sa usa ka punirarya sa dakbayan ug gipaabot pa ang mga tagtungod sa pag-ila ug pagkuha niini. - BANAT NEWS