Tomas mananghid sa konseho aron ikiha ang Kapitolyo

CEBU, Philippines - Mopahigayon karong hapon og usa ka special session ang konseho sa dakbayan sa Sugbu aron tukion ang gipangayo ni Mayor Tomas Osmeña nga pagtugot sa City Council alang na sa pagpasaka og kaso sa kagamhanan sa lalawigan.

Nagplano ang mayor pagkiha sa Kapitolyo tungod sa napirmahan niining kasabutan may kalabutan sa pag-uli sa luna sa Central Command ngadto sa kagamhanan sa lalawigan nga gideklarar nang socialized housing site ang maong dapit.

Bisan tuod kung dunay pasiunang kasabutan ang Kapitolyo uban sa apektadong mga residente diha sa barangay Apas nga nauyunan niini, apan dili kombinsido si Osmeña nga kini tumanon ni Gobernadora Gwendolyn Garcia.

Kini tungod usab sa gituuhan sa mayor nga walay palabra de honor ang gobernador human mabaraw ug wala mapadayon ang land swap deal tali sa kagamhanan sa dakbayan ug lalawigan sa Sugbu nga niresulta sa panagbangi sa duha ka lider.

Gawas niini, dismayado usab si Osmeña sa kapakyas sa Kapitolyo paghatag sa deed of sale ingon man sa mga titulo ngadto sa tanang mga benipisyaryo sa 93-1 lot nga dugay rang nahuman pagbayad sa ilang obligasyon.

Samtang si Bise Mayor Michael Rama miingon nga ila unyang tan-awon kung duna bay basehanan ang pagkiha sa siyudad sa probinsya ug kini maoy ilang tukion sa ipahigayong special session nga gipatawag pinaagi sa resolusyon ni Konsehal Edgardo Labella nga maoy chairman sa Committee on Laws and Ordinances sa City Council.

Gitataw sa bise mayor nga kung dunay lig-ong basehanan pagkiha sa probinsya, sila sa Konseho dili magdumili paghatag og pagtugot sa mayor sa plano niini. - BANAT NEWS