Giguroy gawas sa balay gipatay

CEBU, Philippines - Giguroy atubangan sa iyang mga anak ug kapuyo paggawas sa iyang balay ang usa ka mag-uuma ug pagkahuman gibulit og bala ang kalawasan hangtud namatay kagahapon sa kaadlawon sa sitio Binaliw 3, barangay Binaliw ning dakbayan.

Si Maximo “Pla-pla” Managat Padayogdog Jr., 23, molupyo sa nahisgutang lugar ang nakaangkon og samad pinusilan sa nagkadaiyang parte sa lawas.

Matud pa sa ka live-in sa biktima nga si Miriam Hernani nga sa wala pa kini mahitabo dunay nagsige og tawag sa biktima apan wala nila kini panumbalinga, apan kalit lang misulod ang tulo ka lalaki pinaagi sa pagguba sa ilang pultahan. Sumala pa ni Hernani nagpakiluoy pa ang biktima sa maong mga lalaki nga dili apilon pagpasipala ang iyang pamilya ug dihadiha giguroy sa tulo ang biktima gawas sa balay ug diha-diha nadungog nalang nila ang butobuto sa armas diha sa sulod sa balay.

Ang amahan sa biktima nga si Maximo Sr. kinsa nakadungog sa mga butobuto sa armas daling misusi sa gawas sa ilang panimalay ug maoy iyang nakita ang iyang anak nga naglunang sa kaugalingong dugo.

Daling nagpakitabang sa barangay ang amahan ug gidala sa Cebu City Medical Center apan gideklarar kining dead on arrival sa mga doktor.

Nakuha sa kapolisan ang 13 ka kabhang sa kalibre .45, usa ka slug ug usa ka deformed slug diha sa crime scene.

Ang biktima may lima ka samad pinusilan sa tiyan nga milapos sa likod, tulo sa walang bitiis ug usa sa tuong bitiis.

Matud pa ni PO2 Lou Pagara sa pakighinabi sa Banat News nga ila karon nga gisubay ang mga kasong na-blotter sa barangay Binaliw nga naglambigit sa biktima.

Dugang pa ni Pagara nga base sa ilang pasiunang nakuhang kasayuran, daghan nang reklamo batok sa biktima ug sagad niini mao ang pagpangawat, susihon pa usab ang ubang anggulo gawas niini.  - BANAT NEWS