CEBU, Philippines - Usa ka batan-ong lalaki nga gikatahong nasakpang nanglili sa iyang silingan napalgan nalang nga walay kinabuhi sa punoan sa kahoy gumikan sa kahadlok dihang gibaharang pasakaan og kaso sa iyang gibusohan.
Patay nang nakit-an sa iyang mga kabanay ug silingan si Jemar Oflaza Mata, 19, taga sitio Tapon barangay Baigad lungsud sa Bantayan mga alas 9:38 niadtong Biyernes sa gabii.
Sa report nga nadangat sa Operations Branch sa Cebu Provincial Police Office gikatahong naguol ang nagpakamatay nga si Mata human iyang nahibaw-ang ang dalagang silingan nga iyang gilili mibahad nga pasakaan gyud siya’g kaso.
Sumala pa nga niadtong Martes gikatahong naligo ang dalaga sa banyo sa ilang panimalay nga hubo tanang lawas apan giingong nisulod si Mata nga walay pananghid ug nanglili apan nasakpan.
Human sa maong insidente wala na mopakita si Mata sa mga kabanay ug silingan ug nakurat nalang sila dihang ilang nakit-an sa usa sa mga hilit nga lugar sa ilang dapit nga nagbitay na kini sa punoan sa kahoy nga may higot sa liog.
Gikatahong pwerteng guola niini nga mapriso hinungdan nga wala na gyud mopauli.Ang langsa nga baho sa dapit diin kini mapalgi maoy naggiya sa mga residente nga makit-an ang patay’ng lawas niini nga gihulagway sa Municipal Health Officer sa Sta. Fe nga si Rowena Manalili nga nagsugod na og kadugta. Gisusi pa sa kapulisan kun walay foul play sa kamatayon niini. (BANATNEWS)