CEBU, Philippines - Usa ka bata ang natawong giingong naa sa gawas ang kasing-kasing diha sa sitio Das sa barangay Bitoon sa lungsod sa Daanbantayan kagahapon sa kaadlawon.
Si Sweetsie Etcuban Magdadaro, 27, inahan sa batang babayeng gikahinabi sa Banat News sa telepono mibutyag nga nahingawa sila pagkakita sa iyang anak nga dunay susama og dakong unod nga pareho og dagway sa kasing-kasing nga nagpatong sa dughan niini.
Ang maong unod matud pa niya dunay dakong ugat ug nagpunay og pitik, nabalaka ang inahan sa kahimtang sa ikaupat niyang anak sanglit wala pay bisan usa ka doctor o barangay health worker nga nakakita niini kagahapon.
Sumala pa niya nga usa ka mananabang ang mitabang sa iyang pagpanganak gumikan kay wala sila’y ikabayad pagpanganak sa tambalanan, mao usab kini ang rason nganong bisan sa dili normal nga dagway sa iyang gipanganak wala nila kini dad-a sa tambalanan o sa barangay health center sa lungsod.
“Natawo ni siya ganihang alas-4 sa kaadlawon (kagahapon) mao lagi na ba ang iyang heart naa man sa gawas, nagtungtong gyud sa dughan, magpitik man sir, klaro kaayo inig ginhawa murag dunay dakong ugat nigimaw sa gawas, ang naka-kuan kay dili kaayo siya motutoy,” matud pang Sweetsie.
Ang magtiayon parehong walay klarong mga trabaho ug nagsalig lang nga dunay mopasanggi og mais sa ilang dapit. Duna silay tulo ka mga anak nga nag-edad og siyete, sais ug kwatro anyos.
Si Dr. Mario Fernandez sa Daanbantayan District Hospital nga gikahinabi sa Banat News mibutyag nga wala siya makadawat og susamang pasyente kagahapong adlawa.
Apan kini mitug-an nga kinahanglang madala sa mga ginikanan ang maong bata sa tambalanan aron masusi ang kahimtang niini ug matan-aw kun maluwas pa ba kini.
“Ang angay nilang buhaton, mawala man o naa sila’y kwarta ilang dad-on sa hospital or sa Rural Health Center aron sila matabangan, ug buhi pa ang bata mas maayong ilang dad-on sa hospital aron mahatagan og chance,” matud pa ni Fernandez sa telepono.
Ang mga ginikanan nangayo karon og panabang sa mga tawo aron madala sa tambalanan ang ilang anak, samtang gisuwayan sa Banat News og tawag ang RHU sa maong lungsod apan putol ang linya sa telepono niini. (Edwin Ian Melecio) (BANATNEWS)