CEBU, Philippines - Gihimakak ni Tudela Mayor Rogelio Baquerfo nga dili tinuod nga gi-hit and run sa iyang driver ang usa ka batan-on niadtong Biyernes sa gabii dihang padulong na unta silang mamauli gikan sa culminating party sa ilang gipahigayong kalihukan sa pag-ugnat sa kusog sa barangay Southern Poblacion.
Kini maoy giklaro ni Baquerfo atol sa report sa DySS kagahapon ug wala nila biyai ug gipasagdan ang biktima sukwahi sa mga nikatap nga text messages nga hit-and-run ang nahitabo.
Nabalian sa tiil ang biktimang si Leonardo Esquero, 23, taga barangay Libertad lungsud sa Poro human maligsi sa van ni Baquerfo nga gimaneho sa driver niining si Cesario Garciano.
Sumala pa niini nga naigo ra sa tiil ang batan-on ug luwas na kini sa makuyaw nga kahimtang gani gihatagan kini niya gilayon og 10 mil aron nga maatiman sa mga doktor ug mipasalig nga tabangan ang biktima.
Si Insp. Wilfredo Giducos nagkanayon nga gi-detain ang driver nga si Garciano ingon man ang sakyanan sa mayor human sa maong aksidente.
Matud pa niini nga nagpaabot pa sila sa desisyon sa pamilya sa batan-on kun mopasaka og reklamo hangtud sa Lunes. Giklaro usab ni Giducos nga walay hit-and run nga nahitabo.
Dugang nakuhang impormasyon niini ngadto sa iyang mga imbestigador gikatahong naka-inom usab ang biktima niadtong higayuna gikan nitan-aw og basketball ug wala makabantay nga duol na niini ang sakyanan sa mayor. (Guam Logroño) (BANATNEWS)