Gungob posibleng makasuhan sa gihimo - DILG

CEBU, Philippines - Bisan pa man og gibalik na og hatag ni Consolacion Mayor Avelino Gungob ang supply sa kuryente ug telepono sa Consolacion Police, ang Department of Interior and Local Government kon DILG mipadayag nga si Mayor Gungob mahimo gihapong masuspenso.

 Sumala pa ni DILG-7 legal officer, Atty. Danilo Almendras nga ang gihimo ni Gungob pagputol sa kuryente ug telepono sa kapolisan usa ka “abuse of discretion.” Sa interview sa DyRF, si Almendras miingon nga sigon sa RA 6975 ang mga local executives recommendatory ra ang ilang gahum ilawom sa kapolisan.

Gipasabot usab ni Almendras nga walay katungod ang mayor sa pagputol sa linya sa kuryente ug telepono sa kapolisan sa lungsod sa Consolacion sanglit ang konseho sa maong lungsod maoy mitagana og pundo alang niini ug igo na lamang sa pagtuman ang mayor niini.

 Matud pa ni Almendras nga si bisan kinsang mga mulupyo sa lungsod sa Consolacion, ilabina sa mga biktima sa krimen nga wala makakuha dayon og police assistance tungod sa pagputol sa telepono sa police, mahimong makapasaka og sumbong ngadto sa Provincial Board o ba kaha sa Ombudsman Visayas.

 Dugang pa niini, nga kun mapamatud-ang sad-an ang mayor mahimo kining masuspenso sa iyang katungdanan.  –   BANAT NEWS