CEBU, Philippines - Gisaway og maayo nila ni Lahug barangay kapitan Mary Ann delos Santos ug sa negosyateng si Jonathan “Atan” Guardo ang kapakyas ni Mayor Tomas Osmeña sa pagdumala sa Cebu City Medical Center.
Matud pang Guardo nga base sa iyang nasayran ang mga mangadto sa CCMC igo rang resitahan imbes nga tambal ang ihatag sa doctor kini bisan pampubliko kining tambalanan.
Tungod niini si delos Santos ug Guardo molusad og programang motagad sa tanang senior citizen ug katawhan susama sa medicare.Mipadayag hinuon ang duha nga hulga gyud hinuon ang P2 mil nga financial assistance ni Mayor Tomas Osmeña ngadto sa mga senior citizen tungod kay basin sa kaikog dili na botaran ang mga kandidato sa oposisyon.
Apan gipasabot ni Delos Santos kagahapong adlawa sa gipahigayon nga meeting ang mga senior citizen nga dili angayang maikog tungod kay ang kwartang gipanghatag gikan ra usab sa buhis sa publiko.
Samtang sa laing bahin, si Guardo ug si Lahug barangay Captain Mary Ann Delos Santos nga nagpahibalo nga modagan isip kongresista sa south ug north district adunay plataporma nga gisunod diin gikatawag kini ug “OUR CITY” nga atbang sa “MY City” sa kampo ni Osmeña.
Ang Our City matud pa sa duha nagpasabot ang tanang tawong molupyo sa dakbayan makaangkon og oportunidad sa trabaho, kalamboan, panaghiusa, maayong panglawas ug uban pa.
Si Guardo mibutyag nga kongresista sa South District gyud ang iyang daganan samtang si Delos Santos wala gihapon mopahibalo kabahin sa daganang pwesto apan kaniadto pa kini gidungog nga modagan kini pagka-kongresista sa North District atbang sa anak ni Rep. Raul del Mar nga si Cutie del Mar.
Si Guardo nagkanayon nga lahi sa estilo ni South District Antonio Cuenco ug del Mar magtinabangay silang duha sa kalamboan sa duha ka distrito. – BANAT NEWS