CEBU, Philippines - Patubagon sa director sa Cebu Provincial Police Office ang mga hepe sa kapolisan sa kalungsuran tungod sa ilang kapakyas sa kampanya Kontra Boga ug Bilang Boga karong Lunes.
Si Sr. Supt. Jesus Gaquing nasagmuyo sa napulo ka police stations nga wala makaabot sa gidaghanon sa armas nga kinahanglang ilang masakmit o ba kaha mapa-rehistro sugod Hulyo 1 hangtud na sa Oktubre 31 nga gihimong amnesty program.
Sumala pa sagad niining maong mga police stations tagsa ra ka armas maoy na-report nga ilang narekober bisan duna na sila’y mga listahan niadtong mga tawong may mga armas nga wala pa makapa-renew sa lisensya niini.
Si PNP director general Jesus Versoza Jr. milusad sa maong amnesty program tungod sa kadaghan sa loose firearms sa nasud ug target nilang sulod niining tuiga makuhaan og tulo ka porsiyento ang gidaghanon sa loose firearms matag buwan.
Matud pa sa PNP dunay 1.1 milyones nga loose firearms sa tibuok nasud ug milampos hinuon pagkab-ot sa tulo ka porsiyento.
Dinhi sa rehiyon, mikabat sa 1,000 ka mga loose firearms ang narekober sa Police Regional Office-7 sugod niadtong Hulyo hangtud sa Oktubre 31.
Sa pagsulod niining bulana, mipagawas si Presidente Gloria Macapagal Arroyo sa Executive Order 817 nga nag-extend og laing 30 ka adlaw sa gun amnesty program ug kini matapos karong Nobiyembre 30. - Guam Logroño (BANAT NEWS)