CEBU, Philippines - Mokabat ngadto sa 30 porsiyento ang paglapas sa target collection sa Bureau of Customs - Cebu District Office sa milabay’ng bulan sa Oktubre ning tuiga.
Matud pa ni Cebu Customs Assessment Chief Carlos Corsiga nga ang kadaghan sa volume sa importasyon ug eksportasyon sa Oktubre maoy hinungdan sa paglapas sa target collection nga gidestino sa Department of Finance sa BOC-Cebu.
Samtang si Conrado Abarintos, hepe sa Collection Division sa BOC-Cebu mipakita og dokumento nga ang target sa Oktubre mokabat ngadto sa P502 milyones ug ang collection mokabat sa P652.9 milyones diin mitala sa 30.07% ang paglapas niini.
Ang kalambuan gikalipay ni Cebu Customs District Collector Ricardo Belmonte gumikan kay sa nahibiling duha ka bulan ning tuiga, gamay na lang ang ilang sagubangon nga kantidad aron hingpit na nga makuha ang target collection sa tuig 2009.
Ang Port of Cebu gihatagan og P5.6 bilyones nga target collection sa 2009. Hangtod ning pagsuwat ning balita, P5.080 bilyones ang nakolekta sa BOC-Cebu.
Masaligon si Corsiga nga sa nahibiling duha ka bulan sa dili pa mahuman ang tuig 2009, ilang makuha ang target collection inabagan sa mga sakop sa Economic Team ni Belmonte nga kanunay’ng nagbantay sa aduana aron dili makalusot ngadto kanila ang mga smugglers ug makabayad sa saktong buhis ang mga importers sa ilang buhatan. - Bong Soriano (BANAT NEWS)