CEBU, Philippines - Gituman g’yod nila ni opposition leader Jonathan “Atan” Guardo ug Mary Ann De Los Santos nga sila magkuyog paglusad sa ilang bag-ong advocacy ug ang mga negosyante og isda sa Pasil Fish Market maoy una nila nga gibisitahan kagahapon.
Daw sa susama na g’yod sa nangampanya sila si Guardo ug De Los Santos kay sila nanglamano sa mga tawo didto sa Pasil Fish Market nga klaro kaayong nakalitan sa ilang pagbisita sa malang-og nga baligyaanan og mga isda.
Wala hinuon sila mopaila nga mga kandidato sa bisan unsa nga pwesto sa kagamhanan. Didto hinuon sa Pasil Fish Market dunay mga tawo nga misinggit nga “Atan Na Ta!” nga maoy campaign slogan kaniadto ni Guardo dihang midagan siya pagka kongresista sa eleksyon kaniadtong 2007.
Si Guardo nagsul-ob og “orange” nga T-shirt, samtang si De Los Santos “Green” ug ang dapit sa dughan dunay marka nga “Our City” nga nagpasabot sa ilang advocacy nga mao ang Opportunity, Unity ug Reform.
Didto sa sudlonon nga bahin sa barangay Pasil, ang grupo nila ni Guardo ug De Los Santos gisugat og mga tawo nga nagbitbit og placards nga dunay marka nga “Welcome Atan Guardo.” Ang maong mga tawo mitug-an sa mga reporters nga bisan unsay daganan nga pwesto ni Guardo ila g’yod nga suportahan.
Sa press conference nga gihimo sa barangay tanod headquarters sa Pasil, sila si Guardo ug De Los Santos namahayag nga wala pa g’yod sila makombinsir nga modagan sa pagka mayor ug bise mayor.
Giangkon hinoon nila nga ang ilang mga lihok daw sa naghatag na og ideya nga modagan sila sa mas labing taas nga elective position sa dakbayan sa Sugbo.
Matud ni Guardo nga mas daku siya og mahatag nga tabang sa katawhan kun mahimo siya nga mayor kay sa usa lang ka kongresista, apan bisan pa niini wala pa siya makombinsir sa awhag nga modagan pagka mayor.
Si De Los Santos miingon nga bisan hinoon og dili sila mayor ug bise mayor, daku gihapon sila og matabang sa katawhan kun sila mapili sa pagka kongresista. – BANAT NEWS