Hepe sa Compostela patubagon

CEBU, Philippines - Hepe sa Compostela Police Station nga si Insp. Milo Dagasdas imbestigahon sa Police Regional Office (PRO-7) tungod sa kapakyas pagduso og report sa operasyon sa National Bureau of Investigation (NBI) sa Estaca, Compostela nga miresulta sa pagkamatay sa giingong lider sa mga tulisan nga si Alvin Flores ug mga kaubanan.

Si Sr. Supt. Marcelo Garbo, deputy regional director for operation sa PRO-7 miingon nga tulobagon ni Insp. Dagasdas ang kapakyas pagduso og report sa Cebu Provincial Police Office ug Regional Tactical Operations Office kalabot sa insidente.

Matud pa ni Garbo nga ‘neglect of duty’ ang nahimo sa hepe nga wala gayud mohimo og lakang bisan pagpahibalo pinaagi sa text sa hitabo o pagtawag sa cellphone ngadto sa PRO-7 aron maduso ang report ngadto sa Camp Crame.

Nasayran nga mas nakauna pa hinuon sa pagkahibalo si Presidente Gloria Macapagal-Arroyo sa insidente kay kang PNP Chief Jesus Verzosa kinsa nasagmuyo dihang gipahibalo na mismo sa pangulo.

Ang maong kapakyas mahimong grounds sa dismissal, dugang pa ni Garbo.

Si Cebu Provincial Police Office director Jesus Gaquing, iyang intelligence officer ug ang intelligence officer sa Compostela Police Station gipatubag usab sa PRO-7. Gipadayag usab ni Garbo ang kasagmuyo sa PNP ngadto sa mga sakop sa NBI-Manila tungod kay wala kini saktong koordinasyon sa kapolisan. – BANAT NEWS