One Cebu mabuak

CEBU, Philippines - Gikabalak-an nga hingpit nang mabuak ang One Cebu Party ni Gobernador Gwendolyn Garcia sa mosunod nga mga adlaw human sa pahibalo ni Bise Gobernador Gregorio Sanchez Jr. nga hingpit nang mobiya sa partido.

Mipadayag og kalipay ang presidente sa Municipal Mayors League, Mayor Cesar Baricuatro sa Dumanjug human makahibalo sa kalambuan tungod kay dili layo ang posibling ‘political alliance’ tali niya ug sa kampo ni Sanchez.

Gibutyag ni Baricuatro sa dihang nahinabi sa usa ka estasyonan sa radyo nga managsama sila ni Sanchez nga pulos misuporta sa kandidatura ni Sen. Manny Villar ubos sa partido Nacionalista.

Matud ni Baricuatro nga mapugos usab siya og biya sa One Cebu Party ning mosunod nga mga adlaw kun kinahanglanon ang pagdesisyon human usab determinado na si Garcia nga adto mopaluyo sa kandidato sa administrasyon nga si Defense Sec. Gilberto ‘Gibo’ Teodoro. Gikonpirmar usab ni Baricuatro nga sa iyang bahin determinado na usab nga mokandidato pagka-kongresista sa ikaduhang distrito atbang ni Kongresista Pablo Garcia, amahan ni Gwendolyn.

Sumala pa niya nga walay labot ang Liga sa iyang desisyon. – BANAT NEWS