Nag-birthday gipusil

CEBU, Philippines - Nabali ang tiil sa usa ka tawo nga nagsaulog sa iyang adlaw’ng natawhan human kini pusila sa usa ka lalaki nga nagmotor didto sa Sitio Seawage, Barangay Pusok, dakbayan sa Lapulapu sa milabay’ng hapon.

 Ang biktima mao si Carlo Dalumpinis y Otadoy, 31, ulitawo , lumad nga taga   Barangay Mercedez, lungsod sa Puro, Isla sa Camotes ug kasamtangang nagpuyo sa Barangay Ibo, dakbayan sa Lapulapu ,ug usa ka drayber sa traysikol.

 Si SPO1 Honorato Inihao sa Crime Against Persons (homicide) mibutyag sa Banat News nga nagsaulog si Otadoy sa iyang ika-31 nga sumad sa adlaw’ng natawhan uban sa iyang mga higala ug kaubang drayber sa traysikol.

 Apan taliwala sa ilang kaalegre, mitunga ang usa ka lalaki nga nagsakay og motorsiklo ug walay tingog-tingog nga milanit sa iyang armas de fuego ug gitirohan si Otadoy.

 Si Otadoy naigo sa tuhod ug misangpot sa pagkabali sa iyang tiil ug gihatod dayon ngadto sa Lapulapu City hospital. Samtang ang suspetsado misirit usab dayon pahilayo gikan sa maong lugar nga maoy gipangita karon sa kapolisan sa maong dakbayan. - Bong Soriano (BANAT NEWS)