Kaso sa dengue misaka

CEBU, Philippines - Padayong misaka ang mga kaso sa dengue dinhi sa dakbayan sa Sugbu sulod niining tuiga diin nikalas na og 34 ka kinabuhi.

Sa labing awahing talaan sa City Epidemiology Statistics and Surveillance Unit (CESSU) mikabat na sa 1,670 ang nataptan sa maong sakit.

Kini sukad sa buwan sa Enero hangtod niadtong Oktobre 31, nga mas taas kun itandi sa mga kaso sa susamang period sa miaging tuig nga duna lay 1,078 ka dengue cases.

Ang pagsige og uwan sa miaging buwan maoy giisip nga hinungdan sa CESSU nga nagpabilin gihapon ang mga lamok nga maoy nagdala sa maong sakit.

Gipadayag hinoon ni assistant city epidemiologist Durenda Macasucol nga nagpadayon ang ilang gihingusgang anti-dengue campaign sa dakbayan.

Gani ang mga sanitary inspectors sa siyudad mitakda na usab og laing round sa pagpahigayon og barangay massive mist spraying.

Lakip sa mga barangay nga pahigayonan og mist spraying sugod karong adlawa mao ang Apas, Sambag I, Carreta, Bacayan, Sambag II, ug barangay Inayawan.

Gipahibawo usab ni Macasucol nga nagpadayon ang ilang pulong-pulong sa kabarangayan alang sa pag-edukar sa mga mulopyo labot sa dengue.

Lakip sa mga barangay nga pahigayonan og pulong-pulong sugod ugmang adlawa mao ang Basak San Nicolas ug barangay Bacayan.

Taliwa niini, padayon gihapong giawhag ni Macasucol ang mga Sugbuanon nga motabang sa ilang gihingusgang kampanya.

Kini pinaagi sa regular nga pagpanglimpyo sa palibot ug pagyabo sa napundong tubig ilabi na diha sa mga ligid, flower vase ug uban pa.

Nasayran nga ang barangay Guadalupe, mao gihapon ang nag-una sa 80 ka barangay sa siyudad nga dunay labing daghan og dengue cases.

Kini gisundan sa barangay Camputhaw, Basak San Nicolas, Lahug, Talamban, Labangon, Tisa, Luz, Mabolo ug barangay Punta Princesa.  - Elly Bolonos (BANAT NEWS)