DDB mangayo'g suporta sa katawhan

CEBU, Philippines - Ang suporta sa sosyidad sa kampanya sa kagamhanan batok sa ginadiling drugas maoy epiktibong paagi aron mahaw-as ang nasud gikan sa pagkagumon niini ning maong bisyo.

Mao kini gibutyag kagahapon ni Undersecretary Paul Clarence Oaminal sa Dangerous Drugs Board (DDB) kinsa nagkanayon nga mao kini tumong sa himoong tema sa kasaulogan sa Drug Abuse Prevention and Control Week (DAPCW) karong Nobyembre 16-20, 2009 sa tibuok nasud.

Kining maong kasaulogan adunay tema nga Lihok Katawhan sa Druga Padayon Makigsakbang nga magsilbing hagit ug awhag ngadto sa tanan nga angayang makighiusa sa pagpakigbatok sa ginadiling druga.

Matud pa ni Oaminal nga silang anaa sa maong ahensya sa DDB uban sa ilang enforcement unit nga mao ang Philippine Drug Enforcement Agency (PDEA) naningkmaot sa pagpasundayag sa maong kampanya matag adlaw sa tibuok nasud.

Matud pa niya nga ang kasaulogan sa DAPCW maoy pagpahinumdom sa katawhang Pilipino nga kinahanglang mohatag og gibug-aton sa pagpaluyo sa kampanya sa gobyerno batok niining maong matang sa dautang bisyo.

Busa aron nga magkahiusa ang tanan sa pagpakigbatok sa ginadiling drugas, si Oaminal miawhag sa mga local   nga opisyal sa kagamhanan, akademya, ug sosyidad sibil nga molusad usab og mga susamang programa sa ilang tagsatagsa ka buhatan nga mohaum ug mosakar sa kampanya batok sa ginadiling drugas. - Wen Celen (BANAT NEWS)