CEBU, Philippines - Wala mahimuot si Mayor Tomas Osmeña sa reaksyon sa iyang igsuon nga si Georgia Osmena sa pahibalo sa iyang asawa nga si Margot nga magpapili pagka-konsehal sa habagatang distrito sa siyudad sa umaabot nga eleksyon.
Nagtuo si Georgia nga dili modayon pagpapili ang iyang sister-in-law ug ang pahibalo niini usa lang ka paukyab tungod sa iyang pagtuo nga atimanonon ang iyang igsoon nga mayor, ug kini nanginahanglan sa pagtagad ni Margot. Apan giklaro ni Osmeña nga dili tigpamaba sa iyang asawa si Georgia ug labaw sa tanan, kini wala hatagi og pagtugot nga mosulti sa habig ni Margot.
Gani gihulagway sa mayor ang iyang igsuon nga hipokrita ug nagpatuo lang nga kini nagmahal kaniya apan dili sa tinuod nga sitwasyon. “Sa panahon nga nagmasakiton ko di man mo-text si Georgia, how are you, are you getting better, pero ang iyang mensahe sa publiko, mura'g naghilak gyud siya no?, pero sa actual, wala gyud!..plastik kayo,” sumala ni Osmeña.
Apan gipasabot ni Georgia nga ang iyang igsuon dali kaayong masuko ug mosulti ug dili maayo kaniya sa matag higayon nga kini iyang duolon kaniadto. “If you go near him kay in-love ka pero gi-trato ka that way, why should I allow myself to be embarrassed by him,” matud ni Georgia.
Apan wala palabya sa manghod sa mayor ang pagtratar niini kang kanhi Konsehal Jocelyn “Joy” Pesquera.
Ang kanhi konsehal gusto unta nga mobalik pagpapili pagkakonsehal apan kini gisalikway ni Tomas ug mipili hinuon sa iyang asawa nga si Margot. Giangkon sa mayor nga siya napuno na sa mga intriga batok kang Pesquera nga makapila na usab niya kaniadto sawaya. Nabalaka si Georgia nga wala nay moduol sa mayor tungod kay mahadlok nga mainsultuhan niini sama sa iyang nasinati.
Wala hinuon hatagi og pagtagad ni Margot ang gipadayag ni Georgia apan bisan pa man niini kini nagpasalamat lang gihapon ang iyang bayaw. – BANAT NEWS