Biyudo, 50, napusilan-patay

CEBU, Philippines - Patay ang usa ka 50-anyos nga balo human kini gipusil patay sa usa ka tanod samtang kini nagpahuway sa stage atol sa gipahigayong Halloween disco sa barangay Canagahan lungsod sa San Remegio niadtong Domingo sa alas 4 sa kaadlawon.

Ang biktima mao si Alfonso Pelayo Cataquis, 50, molupyo sa sitio Toong sakop sa nahisgutang barangay samtang ang suspek mao si Alex Muñez, 34, tanod sa nahisgutang lugar.

Matud pa ni PO3 Joejohnnesky Inot sa San Remegio Police dihang nahinabi sa Banat News gikan nga nagsayawsayaw sa diskohan si Cataquis ug pagkahuman nipahuway sa stage dili layo sa diskohan ug paglabay sa pipila ka gutlo giduol kini sa suspek dayun gidul-itan pagpusil makaduha ka higayon.

Tungod sa buto sa armas nagkatibuwaag og panagan pahilayo ang mga nag-disko ug dihang miabot na ang mga awtoridad mao nalay nakit-an ang patay'ng lawas sa biktima nga may pinusilan sa ulo ug wala nay kinabuhi.

Ang kapulisan padayun pa sa ilang manhunt operation pagsikop sa suspek nga padayun pa karung gawasnon samtang gisubay pa ang motibo sa krimen. – BANAT NEWS