CEBU, Philippines - Dakong supak ang komunidad sa mga Muslim sa Kabisay-an sa gideklarar sa Malacanang nga adto lamang ipatuman ang duha ka adlaw nga piyesta opisyal sa kasaulogan sa Eid’l Adha karong Nobyembre 27 ug 28 sa Autonomous Region of Muslim Mindanao (ARMM).
Matud pa ni Sakiran Hajan sa Office of Muslim Affairs nga dili kini angayang buhaton sa kagamhanan tungod kay ang mga Muslim wala lamang manimuyo didto sa lugar nga sakop sa ARMM kundili nalukop kini sa nagkalainlaing lugar sa nasud.
Ang maong pamahayag ni Hajan maoy iyang reaksyon sa gipahayag ni Presidente Gloria Macapagal Arroyo nga imbis ipatuman sa tibuok nasud ang duha ka adlaw nga holiday sa kasaulogan sa Eid”l Adha, adto nalang kini sa ARMM.
Nasayran nga sa matag piyesta opisyal, ang usa ka trabahanteng motunga sa trabaho modawat og P130 sa unang walo ka oras ug 30 porsyento niini ang ipatong sa matag takna nga mosunod lapas sa 8 oras.
Kun ang maong holiday matumong nga day off sa usa ka kawani unya patrabahuon siya, kinahanglang modawat siya og suhol nga P150 sa unang walo ka oras ug 30 porsyento niini ang ipatong sa matag oras nga mosunod. - Wen Celen (BANAT NEWS)