2 ka sunog sa Mandaue kandila hinungdan

CEBU, Philippines - Ang kandila maoy gitan-aw'ng hinungdan sa duha ka mga alarma sa sunog sa managlahing takna ug dapit sa dakbayan sa Mandaue atol sa pagsaulog sa Todos Los Santos niining tuiga.

Si SFO1 Roy Garcia sa Bureau of Fire Protection (BFP) sa maong dakbayan nga nahinabi sa Banat News miingon nga unang alarma sa sunog nahitabo alas 6:30 ang takna sa gabii sa Lower Tabok sa maong dakbayan.

Matud pa niya nga ang panimalay nga gipanag-iya ni Magdalina Cuizon sa Lower Tabok maoy una nilang gitubag nga alarma human mosilaob ang balay tungod sa kandilang nataligam-an diha ibabaw sa altar.

Si SFO1 Garcia miingon nga dali nilang napawong ang kalayo ug wala na kini makahigayon sa pagkatap ngadto sa mga sikbit nga panimalay nga pulos ginama sa light materials.

Gibanabana ni SFO1 Garcia ang danyos sa nasunog nga panimalay og mokabat sa P8,000 nga kantidad ug walay gikatahong naangol o nakalas nga kinabuhi.

Ang ikaduhang alarma nahitabo diha sa Zone II sa Canduman Housing sa barangay Canduman sa maong dakbayan alas 8:46 ang takna sa gabii nga gipanag-iya sa usa ka Francisca Lada.

Susama sa nahaunang sunog, gidudahang kandila sa altar gihapon nagsugod ang kalayo ug ang mga silingan na maoy nakabantay ug nagtabang sa pagbubo og tubig pagpawong sa kalayo.

Wala na makapasirit og tubig ang nangabot nga mga bombero tungod kay napawong na kini sa mga silingan sa ilang paghidangat sa maong dapit.

Si Garcia mibanabana sa danyos nga nagkantidad og P5,000. (BANATNEWS)