Mata napisok sa bala

CEBU, Philippines - Namatay ang usa ka tawo nga napisok ang walang mata tungod sa bala human pusila sa iyang suod nga higala sa miaging gabii atol sa pagsaulog sa Todos Los Santos sa sitio Socoro sa barangay Dapitan, lungsod sa Cordova.

Si SPO1 Henry Amores, imbestigador sa kapolisan sa maong lungsod miila sa namatay nga mao si Junnel Mendoza, lumad nga taga Negros Occidental ug kasamtangang nagpuyo sa maong dapit samtang ang suspetsado giilang si Ric Ligan Canete, 24, nagpuyo usab sa maong dapit.

Matud pa ni SPO1 Amores nga ang saksi sa maong pagpamusil nga si Neil Jumao-as mitug-an nga may nakaaway ang suspek diha sa ilang dapit nga giilang si Jojo Rosalejos.

Dugang pa niya nga nagbarog si Rosalejos sa daplin sa dalan sa maong dapit tupad si Mendoza ug Jomao-as niadtong tungura.

Sa paghiabot sa suspetsado sa maong dapit kalit kining miibot sa armas nga kalibre .38 ug dayong pusil kang Rosalejos apan nakatakilid ang naulahi ug wala kini maigo apan ang biktima diha sa tupad niini maoy naigo sa walang mata.

Human niini daling misutoy og dagan palayo ang suspek nga gigukod ni Cañete apan nakaeskapo gyud kini diha sa ngitngit nga dapit.

Gidala sa Lapulapu District Hospital ang biktima apan gideklarar kini sa mga doktor nga dead on arrival.

Sumala pa ni SPO1 Amores nga human nila matultuli ang gitagoan sa suspek ilahang gihangyo ang inahan niini pagkumbinsir kaniya sa pagtahan ug kagahapon sa udto mitahan kini sa kaugalingon diha sa kapolisan.    (BANATNEWS)