Cabillon mihimakak sa mga kaso

CEBU, Philippines - Kusganong gihimakak sa kontrobersyal nga monghe sa Lindogon, Simala sa Sibonga ang mga alegasyon kabahin sa gipasakang kasong estafa ug acts of lasciviousness sa superior sa Lindogon Shrine ug laing monghe batok kaniya.

Si Venancio Cabillon nga kanhi monghe sa Lindogon kansang relihiyosong pangalan mao si Frater Paul Mary sa pakighinabi sa Banat News kagahapon mihimakak sa mga kasong gipasaka batok kaniya ug miingon nga kini gihimo lang isip ‘counter-charges’ sa kasong libelo nga gipasaka niya batok sa mga kadagkuan sa simbahan sa Sugbu.

Ang mga gipang-kasuhan ni Cabillon duha ka semana na ang nakalabay mao sila si Cebu Archbishop Ricardo Cardinal Vidal ug lima ka opisyales sa simbahan tungod sa pagkapublikar sa pagkataktak kaniya sa pagkamonghe ug ang mga pasangil nga gipatik sa Ang Bag-ong Lungsoranon nga pamantalaan sa Artsidiyosisi.

Matud pang Cabillon walay kamatuuran ang pasangil sa usa ka batan-ong monghe niadtong Disyembre 31, 2008 nga iyang gimolestiya ibabaw sa kampanaryo tungod kay nianang bulana nadetiner siya sa karsel sa monasteryo ug imposibleng makagawas siya aron lang manghinol.

Matud pa niya ang karsel sa mga monghe naa sa lowest layer sa monasteryo tungod sa kalapasan niya pagpirma og dokumentong nakapabuwag sa duha ka mga pundok sa Third Order of the Marian Monks nga maoy mag-escort sa pilgrims sa Mahal nga Birhen tungod kay ang duha kanunay'ng wala magkasinabot.

Sumala pa niya, Oktubre 2007 hangtud Enero 2009 siya nabilanggo sa maong karsel ug dihang mihulga siyang maghikog una pa siya gidesisyonang buhian.

Miangkon hinuon si Cabillon nga usa siya ka mahuyang apan kusganon niyang gihimakak nga siya maoy ‘manghilabot’ sa mga kaubang monghe kundili siya pa gyud maoy kanunay mabiktima, matud pa niya ang mga mongheng ‘nanghilabot’ (mga pangalan gipugngan sa Banat News) kaniya pabiling nagserbisyo diha sa Lindogon.

Gipanghimakak usab ni Cabillon ang kabahin sa giingong pagwaldas niya sa salaping gipadala ni Mangila kaniya ngadto sa Leyte sanglit bugtong gipadala kaniya mao ra ang P10 mil niadtong Enero 11, 2009 ug Enero 9 nga P5 mil lakip na ang 100 ka plastic nga bangko ug walay mga alahas sa Mahal nga Birhen, ‘Monstrance’ ug tabernakulo nga gipasangil diha sa kasong estafa batok kaniya.

Gihulagway niyang gibutang-butangan lang siya tungod kay wala siya magpadala sa hulhog nga makigkita sa kadagkuan sa Simbahan nga sa iyang pagtuo aron siya pahilumon pinaagi sa kwarta.   (BANATNEWS)