CEBU, Philippines - Patay diha-diha ang usa ka 28-anyos nga ulitawo human gisaka sa balay niini samtang nagkaon ug gitigbas sa ulo makaduha ka higayon sa iyang gikaaway’ng silingan sa barangay Upper Lunes lungsod sa Asturias niadtong Domingo sa alas 4:30 sa kaadlawon.
Ang biktima mao si Benjie Mahilum, 28, molupyo sa nahisgutang lugar samtang ang suspek mao si Jesmar Arojo, 21, nagpuyo gihapon sa maong dapit.
Matud ni PO3 Philip Acaso sa Asturias police dihang nahinabi sa Banat News, nagkaon si Mahilum nianang tungura diha sa kusina sa iyang paryente dihang kalit lang kining gisaka sa suspek nga nagbitbit nang daan og sundang.
Human tigbasa sa tunga sa ulo daling miikyas ang suspek sa balay samtang diriyot mapikas ang ulo ni Mahilum ug wala na madala pa sa tambalanan.
Ang kapulisan nakahipos og report gikan sa mga opisyal sa barangay nga dunay pagka- maldito sa ilang lugar ang biktima ug mao kini gitutukan sa nagpadayong imbestigasyon sa kapulisan nga posibleng personal ang motibo sa suspek pagpatay sa biktima. (Darrel Carumba) (BANATNEWS)