Pre-schools pabayron og buhis

CEBU, Philippines - Nagtinguha usab ang Cebu City Treasurer’s Office (CTO) pagkolekta og business taxes ngadto sa mga preparatory schools sa siyudad human ipatuman sa CTO ang status quo nga naghiklin una sa pagpadala og certificate of tax delinquency ngadto sa mga proprietary schools ug hospitals sa dakbayan.

Gimanduan na ni City Treasurer Ofelia Oliva ang inspection and examination division sa ilang departamento pagtan-aw sa status sa maong mga tunghaan.

Nahibaw-an ni Oliva nga ubay-ubay sa mga pre-schools sa siyudad ang nag-operate ubos sa non-stock, non-profit institutions, apan tataw sa amended tax ordinance sa dakbayan nga ang mga proprietary schools ug hospitals gi-reclassify na isip industries nga mahimong buhisan.

Nagkanayon ang City Treasurer nga siya dili gustong maakusahan nga dunay gipaburan hinungdan nga iyang ipatuman ang ordinansa sa tanan.

“They should pay also aron dili ta maakusahan nga atong gipaburan ang uban unya atong gikontrahan pud ang uban,” sumala ni Oliva.

Gipadayag ni Oliva nga ila usab nga padalhan og demand letter ang mga pre-schools sa siyudad sa mosunod nga mga adlaw. Kung dili niini hatagan og pagtagad ang maong suwat, isunod usab dayon paghatod ang final demand letter sa dili pa ang certificate of tax delinquency uban sa warrant of levy ug kini ipa-auction.   (Elly Bolonos)    (BANATNEWS)